मंडळी सध्या राज्याच्या काही भागात कडाक्याची थंडी अनुभवली जात आहे, आणि हवामान विभागानुसार, आता राज्यभरात पाऊस पडण्याची शक्यता आहे. भारतीय हवामान विभागाने (आयएमडी) चक्रीवादळ निर्माण होण्याची माहिती दिली आहे. नैऋत्य किनारपट्टी, आग्नेय समुद्र आणि बंगालच्या उपसागरात चक्रीवादळाची स्थिती निर्माण झाली आहे. यामुळे काही ठिकाणी दाट धुके आणि थंडी वाढली आहे, तसेच काही ठिकाणी पावसाचे आणि ढगाळ हवामानाचे संकेत मिळाले आहेत.
कोकणात पावसाचा इशारा
राज्याच्या अनेक भागांमध्ये हलक्या ते मध्यम पावसाची शक्यता आहे, आणि गडगडाटासह पाऊस पडू शकतो. आयएमडीने उत्तर आणि पश्चिम महाराष्ट्रात थंडीच्या लाटेच्या तीव्रतेत वाढ होण्याचा अंदाज व्यक्त केला आहे. तापमानात 2 ते 4 अंश सेल्सिअसने घट होण्याची शक्यता आहे, तर दिवसा किमान तापमान 3 ते 5 अंश सेल्सिअसने वाढू शकते. पुढील 48 तासांत दक्षिण कोकणात पावसाची शक्यता वर्तवण्यात आली आहे. त्यानंतर हवामान कोरडे होण्याची शक्यता आहे.
राज्यात हलक्या पावसाचा इशारा
मराठवाड्यासाठी पुढील तीन दिवस अत्यंत महत्वाचे ठरू शकतात. 11, 12, आणि 13 जानेवारी रोजी हलका पाऊस पडण्याचा अंदाज आहे. परभणी येथे किमान तापमान 7 अंश सेल्सिअस नोंदवले गेले, तर गोंदिया, नागपूर, वर्धा आणि ब्रह्मपुरी जिल्ह्यांमध्ये किमान तापमान 7 ते 8 अंश सेल्सिअस दरम्यान होते. या भागात कमाल तापमान 28 अंश सेल्सिअसपर्यंत पोहोचले आहे.
उत्तरेकडील राज्यांमध्ये थंडीचा कडाका
उत्तरेकडील राज्यांमध्ये थंडीच्या लाटेत तीव्रतेची वाढ झाली आहे. जोरदार वाऱ्यांमुळे तापमानात आणखी घट झाली आहे. गेल्या दोन दिवसांत, किमान तापमान 2 ते 4 अंशांनी घटले असल्याचे हवामान विभागाने स्पष्ट केले आहे. विदर्भ वगळता, राज्यातील बहुतेक भागात पाऊस पडण्याची शक्यता आहे.
