नमस्कार मित्रांनो राज्याच्या तिजोरीत शिक्षकांच्या पगारासाठी पैसे नसल्याने वेतन रखडणार असल्याची अफवा पसरली होती. मात्र, ही अफवा निराधार असून शिक्षकांचे वेतन नियोजित कालावधीतच होईल, असे शिक्षण विभागातील वरिष्ठ अधिकाऱ्यांनी स्पष्ट केले आहे. शिक्षकांच्या वेतनासाठी आवश्यक असलेली ग्रॅण्ड गुरुवारीच (26 डिसेंबर) राज्य सरकारकडून प्राप्त झाली असून ती संबंधित विभागाकडे वर्ग करण्यात आली आहे.
ऑनलाइन पद्धतीने वेतन प्रक्रिया
राज्य शासन प्राथमिक व माध्यमिक शाळांमधील शिक्षकांचे वेतन ऑनलाइन पद्धतीने करते. वेतन अधीक्षक कार्यालयाकडून दर महिन्याला 25 ते 26 तारखेदरम्यान वेतनासाठीची ग्रॅण्ड तयार केली जाते. यावेळीही 26 डिसेंबर रोजी ही ग्रॅण्ड मंजूर होऊन प्रक्रिया वेळेत पूर्ण करण्यात आली आहे. त्यामुळे शिक्षकांचे वेतन नियोजित कालावधीतच त्यांच्या खात्यात जमा होईल.
पुणे विभागीय शिक्षण उपसंचालकांचे निर्देश
पुणे विभागीय शिक्षण उपसंचालक कार्यालयाने शिक्षकांचे वेतन वेळेत करण्यासाठी आवश्यक प्रक्रिया तातडीने पूर्ण करण्याचे आदेश संबंधित अधिकारी व कर्मचाऱ्यांना दिले आहेत. सोमवारी व मंगळवारी (30 व 31 डिसेंबर) पगार बिले तयार करून त्यावरील प्रक्रिया पूर्ण केली जाईल. त्यानंतर दोन दिवसांत ट्रेझरीच्या माध्यमातून कामकाज पूर्ण होऊन 1 ते 5 तारखेच्या दरम्यान शिक्षकांचे वेतन त्यांच्या खात्यात जमा होईल.
अफवांवर विश्वास न ठेवण्याचे आवाहन
कोणत्याही शिक्षकाचे वेतन रखडणार नाही, असे शिक्षण आयुक्त कार्यालयाने स्पष्ट केले आहे. त्यामुळे अशा अफवांवर विश्वास न ठेवण्याचे आवाहन शिक्षण विभागाने केले आहे.
नवीन वर्षात वेळेत वेतनाची खात्री
नवीन वर्षातही शिक्षकांना नेहमीप्रमाणेच नियोजित वेळेत वेतन मिळणार असून याबाबत चिंता करण्याचे कारण नाही. अफवांवर विश्वास ठेवण्याऐवजी सत्य जाणून घेण्याचे आवाहन करण्यात आले आहे.
