मंडळी बेरोजगार तरुणांसाठी सुरू करण्यात आलेल्या मुख्यमंत्री युवा कार्य प्रशिक्षण योजनेत (Mukhyamantri Yuva Karya Prashikshan Yojana) मोठा गैरव्यवहार झाल्याचे समोर आले आहे. या योजनेअंतर्गत बेरोजगार युवकांना आर्थिक मदत मिळणे अपेक्षित होते. पण राज्यातील एका प्रमुख शिक्षण संस्थेच्या कर्मचाऱ्यांच्या खात्यात लाखो रुपये जमा झाल्याचा धक्कादायक प्रकार उघडकीस आला आहे.
विधान परिषदेतील आरोप आणि सरकारवर ताशेरे
विरोधी पक्षनेते अंबादास दानवे (Ambadas Danve) यांनी हा विषय विधान परिषदेत उपस्थित केल्यानंतर सरकारवर तीव्र टीका होत आहे. योजनेचा निधी पात्र लाभार्थ्यांपर्यंत पोहोचला नसल्यामुळे, सरकार यावर कोणती कारवाई करणार, याकडे संपूर्ण राज्याचे लक्ष लागले आहे.
योजनेचा हेतू आणि भ्रष्टाचाराचे स्वरूप
राज्यातील 18 ते 35 वयोगटातील बेरोजगार तरुणांना दरमहा 6,000 ते 10,000 रुपये प्रशिक्षण भत्ता देण्याची ही योजना सरकारने निवडणुकीच्या पार्श्वभूमीवर जाहीर केली होती. मात्र, लाभार्थ्यांची पडताळणी करताना प्रशासनाने शिक्षण संस्थांशी संपर्क साधला असता, संस्थेने बेरोजगार तरुणांच्या नावाऐवजी आपल्या कार्यरत कर्मचाऱ्यांची नावे शासनाकडे पाठवली आणि त्यांच्या खात्यात अनुदानाची रक्कम जमा करण्यात आली.
सरकारची कारवाई आणि पुढील प्रक्रिया
योजनेत झालेल्या गैरव्यवहाराच्या पार्श्वभूमीवर कौशल्य रोजगार उद्योजकता विभागाने संबंधित शिक्षण संस्थेला नोटीस पाठवली आहे. शासनाच्या अटींचा भंग झाल्याने संस्थेकडून लाभार्थ्यांची वेतन पावती, आधारकार्ड आणि इतर आवश्यक कागदपत्रे मागवण्यात आली आहेत. पुढील चौकशीनंतर दोषींवर कडक कारवाई केली जाणार आहे.
