नमस्कार मित्रांनो मंत्रिमंडळ विस्तारानंतर खातेवाटप प्रक्रिया पूर्ण झाली असून, नव्या मंत्र्यांनी आपापल्या खात्यांवर कामाला सुरुवात केली आहे. यामध्ये कृषी खात्याची जबाबदारी राष्ट्रवादी काँग्रेसच्या अजित पवार गटाला देण्यात आली आहे. जुन्नर विधानसभा मतदारसंघातील आमदार माणिकराव कोकाटे यांची कृषीमंत्री म्हणून नियुक्ती करण्यात आली आहे.
कृषीमंत्र्यांचा शेतकऱ्यांसाठी अ‍ॅक्शन प्लॅन
नवनियुक्त कृषीमंत्री माणिकराव कोकाटे लासलगाव दौऱ्यावर असताना त्यांनी पत्रकारांशी संवाद साधला. शेतकऱ्यांच्या समस्यांवर लक्ष केंद्रित करून आवश्यक निर्णय घेण्याचे आश्वासन त्यांनी दिले.
कृषी खाते ही मोठी जबाबदारी
कोकाटे म्हणाले, कृषी खाते हे जबाबदारीचे खाते असून ते काटेरी मुकुट आहे. शेतकऱ्यांना सतत विविध समस्यांना सामोरे जावे लागते, जसे की अवकाळी पाऊस, बाजारभावातील चढ-उतार. यावर धोरणात्मक निर्णय घेण्याचा माझा प्रयत्न असेल. शेतीतील दीर्घकालीन समस्यांवर तोडगा काढण्यासाठी आम्ही ठोस पावले उचलू.
पिकविमा गैरव्यवहाराची चौकशी होणार
पिकविमा योजनेच्या अंमलबजावणीबाबत त्यांनी गैरप्रकार होत असल्याच्या तक्रारी गंभीरतेने घेतल्या आहेत. कोकाटे म्हणाले, कोणीही पिकविम्याचा गैरफायदा घेतल्यास कठोर कारवाई केली जाईल. मी स्वतः शेतकऱ्याचा मुलगा आहे, त्यामुळे त्यांच्या समस्यांची मला जाणीव आहे. ओल्या दुष्काळासारख्या संकटांवर योग्य निर्णय घेण्याचे काम लवकरच केले जाईल.
सरकारची बांधिलकी आणि मंत्रीपदाची जबाबदारी
माणिकराव कोकाटे यांनी स्पष्ट केले की, युती सरकार स्थिर आणि मजबूत आहे. मी जे बोलतो तेच करतो. मंत्रीपदाची जबाबदारी स्वीकारल्यानंतर शेतकऱ्यांच्या हितासाठी सर्वतोपरी प्रयत्न करेन.
यामुळे शेतकऱ्यांना नवीन कृषीमंत्र्यांकडून मोठ्या अपेक्षा आहेत. पुढील काळात त्यांच्या निर्णयांमुळे शेतकऱ्यांच्या समस्यांवर कितपत तोडगा निघतो, हे पाहणे महत्त्वाचे ठरेल.
